“ابنة الفراعنة قلبها ينبض بعبق التاريخ”

كتبت :  ناديه احمد

حرب اكتوبر وأجواء اكتوبر صعب حد يوصفها

الا لو عاش فى الارض الطاهره عاش علي أرضها بالفعل
كان عندي ٧سنين وصعب عليا افهم اللي بيحصل كنا جيل بسيط غير الجيل الحالي كان صعب افهم ليه امي رايحه جايه وهي شايله الراديو الصغير معاها وليه فجأة كل البيوت انفجرت بالزغاريد وكلمه الله اكبر كانت بتتقال فى بيت الحاج محمد وبيت عم اسكندر ليه كل البلد بقت فى الشارع ليه الكل بيحضن بعضه وبيعيط من الفرحه بس مع الوقت عرفت ليه كل البيوت كانت طايره من الفرحه ليه الزغاريط بتنبعث من البيت اللي اتبلغ بوفاة ابنهم زي اللي اتبلغ بجرح ابنهم زي اللي اتبلغ بعودة ابنهم
عرفت أن مصر اغلا من الضنا وأغلا من الروح نفسها
كبرت فى الأجواء دي مصر خط احمر
اتزرع جوانا حبها والدفاع عنها
ممنوع حد غريب يجيب سيرتها بالسوء
نزعل نتعب نتخانق نتصالح جوا العيله جوه مصر محدش يتدخل احنا عيله ومش مسموح لاي حد يتدخل.